ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានប្រកាសថាសម្ដេចបានក្លាយជានាយករដ្ឋមន្ត្រីក្មេងជាងគេលើពិភពលោកកាលពី៣៨ឆ្នាំមុន ហើយបច្ចុប្បន្នសម្តេចក៏បានក្លាយជានាយករដ្ឋមន្ត្រីកាន់អំណាចយូរជាងគេលើពិភពលោកផងដែរ។

សម្តេចបានឆ្លើយតបនឹងមតិរិះគន់ថា៖ «លោក ហ៊ុន សែន ក្រាញ់អំណាច ខ្ញុំទទួល ប៉ុន្តែខ្ញុំចង់សួរអ្នកឯង អ្នកឯងដណ្តើមអំណាច មានន័យថាម៉េច ខ្ញុំគ្រាន់តែការពារអំណាចដែលខ្ញុំមានតើ ខ្ញុំមានអីខុស»។

សម្តេចតេជោបានលើកឡើងថា បើកាន់អំណាចមិនប្រើអំណាច គឺស្មើនឹងមិនកាន់អំណាច។ សម្តេចនាយករដ្ឋមន្ត្រីអះអាងថា សម្តេចគាំទ្រឱ្យកូនច្បងរបស់សម្តេច គឺ លោក ហ៊ុន ម៉ាណែត ធ្វើជាបេក្ខភាពនាយករដ្ឋមន្ត្រី គឺពិតជាស័ក្តិសមបំផុត។

សម្តេចតេជោបានថ្លែងបែបនេះនៅក្នុងពិធីចែកវិញ្ញាបនបត្រ និងសញ្ញាបត្រជូនដល់សិក្ខាកាម និងនិស្សិតវិទ្យាស្ថានជាតិពាណិជ្ជសាស្ត្រ (NIB) ជាង ៦ពាន់នាក់នាព្រឹកថ្ងៃទី៣០ ខែមីនា ឆ្នាំ២០២៣។

សម្តេចនាយករដ្ឋមន្ត្រីបានកាន់អំណាចនៅឆ្នាំ១៩៨៥ រហូតមដល់បច្ចុប្បន្នគឺមានរយៈពេល ៣៨ឆ្នាំមកហើយ៕